Ким Ун Ён — Гиннес рекордлар китобига киритилган дунёдаги энг ақлли, заковатли инсон (интеллект даражаси — 210, Альберт Эйнштейн ва Стивен Ҳокингда IQ кўрсаткичи 160 бўлган).
Профессорлар оиласида туғилган Ким Ун Ён 6 ойлигидан сўзлай бошлаган, 3 ёшида эса япон, инглиз ва немис тилларида ўқиган ва эркин мулоқот қилган. Ҳар бир тилни ўрганиш учун унга тахминан 30 кун керак бўлган. 4 ёшида интеграл ва дифференциал тенгламаларни ечар, шеър ёзар, расм чизар эди.
4 ёшидан 7 ёшигача Сеулдаги Ханянг университетида ўқиган.
8 ёшида уни АҚШга таклиф қилишган, у ерда таълим олган ва NASA билан ҳамкорлик қилган.
1974 йилдан (12 ёшидан) 1978 йилгача илмий тадқиқот ишлари билан шуғулланган. Кўпчилик унинг илм-фанда инқилоб қилишини башорат қилганди, бироқ кутилмаганда, йигирма ёшларида Жанубий Кореяга қайтган.
У чекка ҳудуддаги бир университетда иш бошлаган.
Журналистлар “Нега бундай қарор қабул қилдингиз?” деб сўрашганда, Ким Ун Ён шундай жавоб берган: “Сиз жуда юқори интеллектуал қобилиятга эга даҳо, математика ёки тиллар бўйича етук мутахассис бўлишингиз мумкин. Лекин ўз ҳиссиётларингизни англаш ва бошқариш қобилияти ривожланмаган бўлса, бу Сизнинг шахсий ва эмоционал тараққиётингизни жиддий равишда чеклайди. Интеллект ва ҳиссиёт бир-бири билан чамбарчас боғлиқ, шахс ривожланиши уларнинг уйғунлигини талаб қилади. Бошқа нарсанинг мен учун аҳамияти йўқ!
Мен одамлар орзу қилган кўп нарсаларга жуда эрта эришганман. Лекин бу мен учун аҳамиятсиз эканини тушуниб етдим. Мен учун оддийлик муҳим”.
Кейинчалик Ким Ун Ён Чхунбук миллий университети профессори бўлди ва Жанубий Корея инфратузилмасини ривожлантиришда фаол иштирок этди.
У ўзининг ҳақиқий қийматини рекордлар ёки кўрсаткичларда эмас, балки жамиятга, инсонларга келтираётган фойдасида кўради.