Умримизнинг кўркидур пиру бадавлат кексалар,
Одамийлик мулкида сиз бизга ибрат, кексалар.
Ой каби нурлар сочур бахтдан чароғон юзлари,
Осмондек бағри кенг, соҳиб саховат кексалар.
Бу ҳаёт бўстонида чин меҳрибон боғбон улар,
Меҳнатидан топгани роҳат-фароғат кексалар.
Жонажон фарзандларига дилда бор меҳрин бериб,
Сўнг набиралар камолин кўзлаган мард кексалар.
Эл аро сиз эзгуликлар айлаб эъзоз ичрасиз,
Ҳур Ватанни яшнатишга кони ғайрат кексалар.
Қари билганни дегайлар, пари билмас ҳеч қачон,
Ҳар муаммонинг иложин топгай, албат, кексалар.
Байраму тўйларда вазмин, камтарин тўйбошисиз,
Оқилу олижаноб, феъли аломат кексалар.
Тоғ каби мағрур, улуғвор, кўксида кек сақламас,
Яхшиликлар қилса-да, қилмайди миннат кексалар.
Сиз — отамнинг отажони, сиз — онамнинг онаси,
Изларингиз кўзга суртай, пойи жаннат кексалар.
Сиз дуога қўл очиб, омад тиларсиз барчага,
Дилдаги орзу-умид бўлгай ижобат, кексалар.
Ўзбекона бу мурувват, ақлу ҳуш, одоб учун —
Таъзим айлаб айтажакмиз, сизга раҳмат, кексалар!
Фахр этармиз сиз билан, сиз — нури Иймон қалъаси,
Борлигингиз ўзи бизга катта давлат, кексалар.
Айтадур Зикрилло: доим тинч-омон бўлсин замон,
Бахтимизга сиз бўлинг соғу саломат, кексалар.
Зикрилла Неъмат,
шоир, “Дўстлик” ордени, 1-даражали “Меҳнат фахрийси” кўкрак нишони соҳиби.