Umrimizning ko'rkidur piru badavlat keksalar,
Odamiylik mulkida siz bizga ibrat, keksalar.
Oy kabi nurlar sochur baxtdan charog'on yuzlari,
Osmondek bag'ri keng, sohib saxovat keksalar.
Bu hayot bo'stonida chin mehribon bog'bon ular,
Mehnatidan topgani rohat-farog'at keksalar.
Jonajon farzandlariga dilda bor mehrin berib,
So'ng nabiralar kamolin ko'zlagan mard keksalar.
El aro siz ezguliklar aylab e'zoz ichrasiz,
Hur Vatanni yashnatishga koni g'ayrat keksalar.
Qari bilganni degaylar, pari bilmas hech qachon,
Har muammoning ilojin topgay, albat, keksalar.
Bayramu to'ylarda vazmin, kamtarin to'yboshisiz,
Oqilu olijanob, fe'li alomat keksalar.
Tog' kabi mag'rur, ulug'vor, ko'ksida kek saqlamas,
Yaxshiliklar qilsa-da, qilmaydi minnat keksalar.
Siz — otamning otajoni, siz — onamning onasi,
Izlaringiz ko'zga surtay, poyi jannat keksalar.
Siz duoga qo'l ochib, omad tilarsiz barchaga,
Dildagi orzu-umid bo'lgay ijobat, keksalar.
O'zbekona bu muruvvat, aqlu hush, odob uchun —
Ta'zim aylab aytajakmiz, sizga rahmat, keksalar!
Faxr etarmiz siz bilan, siz — nuri Iymon qal'asi,
Borligingiz o'zi bizga katta davlat, keksalar.
Aytadur Zikrillo: doim tinch-omon bo'lsin zamon,
Baxtimizga siz bo'ling sog'u salomat, keksalar.
Zikrilla Ne'mat,
shoir, “Do'stlik” ordeni, 1-darajali “Mehnat faxriysi” ko'krak nishoni sohibi.