“Маромийлик” лойиҳаси — амалда
Бугун юртимизда амалда бўлган “Маромийлик” дастури ўзига хос анъанага айланди. Бунинг натижасида оилаларда ортиқча сарф-харажатларнинг олди олиниб, маромийликни таъминлашга эришилмоқда. Айни жараёнда кўплаб оилаларнинг аҳолига кўрсатаётган шахсий намуналари эътирофга сазовор бўлмоқда.
Caмaрқанд вилоятининг Самарқанд туманидаги “Қўшмачит” маҳалласида 81 ёшни қаршилаган нуроний Мўсин бобо Меликов истиқомат қиладилар. Отахон ҳам барчага ибрат бўлиб, файзли, камхарж ва ихчам тўй ўтказдилар.
Бобо бир йўла 5 нафар набирасининг никоҳ, 3 нафар эварасининг суннат тўйларини ўтказиб, эл-юртга камтарона дастурхон ёздилар ва камхарж тўй ўтказиш йўлида ҳаммага бирдек намуна кўрсатдилар.
“Нуроний” жамғармаси Самарқанд вилояти мутасаддилари фаол нуронийнинг ушбу ташаббусини алоҳида эътироф этиб, маҳаллалар учун бу тажрибани ибрат қилиб кўрсатишмоқда.
Мўсин бобо Меликов 1946 йил 28 декабрда деҳқон оиласида таваллуд топган. Меҳнат фаолиятини курилиш корхонасида оддий сувоқчиликдан бошлаган. Кейинчалик тракторчи, 1969 йилдан 2006 йилгача ҳайдовчи бўлиб ишлаган. Нафақага чиққач, 2013 йилга қадар “Қўшмачит” МФЙ раиси сифатида эл-юртга хизмат қилган.
Отахон раис бўлиб ишлаган даврда Меҳрибонлик уйи тарбияланувчиларининг суннат ва никоҳ тўйларини ҳомийлик асосида ўтказиш, оилавий ажримларнинг олдини олиш, маҳаллага ичимлик суви, электр энергияси, табиий газ тармоқларини тортиб келиш ва яна қатор савобли ишларга бош-қош бўлган.
Тиниб-тинчимаган Мўсин бобо 2011 йилдан тадбиркорлик билан шуғулланиб келади. Отахон бугунги кунда 26 нафар фуқарони иш билан банд қилган. Равонак техникуми билан шартнома тузиб, битирувчи ёшларга автотранспорт воситаларига техник хизмат кўрсатиш сирларини ўргатиб келмокда. Ҳозирда “Нуроний” жамғармаси жамоатчилик кенгашининг фаол аъзоси. Ўзбекистон Республикаси Мустақиллигининг 10, 15, 20 йиллик кўкрак нишонлари билан тақдирланган.
Мўсин бобо уч ўғил, уч қизнинг отаси. Фарзандлар ҳам ҳаётда ўзларининг муносиб ўринларини топишган. 17 нафар набира, 11 нафар эвара табаррук отахоннинг давомчилари десак, асло хато қилмаган бўламиз.
Жамиятимизда шиддатли, шу билан бирга, самарали ислоҳот ва янгиланишлар кетмоқда. Уларнинг асл моҳиятини Мўсин бобо Меликов каби кўпни кўрган табаррук нуронийлар амалда яққол кўрсатиб бермоқдаларки, бунинг оқибатида ташаббус ва лойиҳаларимиз кутилган самараларни бериб, халқ фаровонлигига хизмат қилмоқда.
Баҳодир Қиличев,
Самарқанд вилояти.