Mustaqillik yillarida, ayniqsa, oxirgi o'n yil mobaynida yurtimizda amalga oshirilayotgan islohot va yangilanishlar barcha jabhalarda ulkan samaralar berib, qo'lga kiritilayotgan o'ziga xos ko'rsatkichlar nafaqat mamlakatimiz, balki jahondagi nufuzli xalqaro jamiyatlar, rivojlangan davlatlar tomonidan e'tirof etilmoqda.
Mamlakatimiz taraqqiyoti, xalqimiz farovonligi yo'lidagi islohotlarni amalga oshirishda yuksak iqtisodiy-ijtimoiy, madaniy-ma'rifiy quvvatga ega bo'lgan Andijon viloyatining ham salmoqli hissasi bor, albatta. Viloyatning tuman va shaharlari, xususan, Asaka tumanida hozirgi kunda barcha sohalar qatori, faxriylarning ijtimoiy faoliyatini qo'llab-quvvatlash, ularning salomatliklarini muhofaza qilish, oltinga teng bilim salohiyati va tajribalaridan barkamol avlodni tarbiyalash, xalqimiz farovonligini oshirishda faol foydalanishga ustuvor vazifalardan biri sifatida qaralmoqda.
O'zbekiston Respyblikasi Prezidentining 2022 yil 19 yanvardagi “Mahallalarda yoshlar bilan ishlash tizimini tubdan takomillashtirish chora-tadbirlari to'g'risida”gi 92-sonli, 2022 yil 15 martdagi “Nuroniylarni har tomonlama qo'llab-quvvatlash, ularning hayot darajasini oshirishga doir qo'shimcha chora-tadbirlar to'g'risida”gi 167-sonli va 2023 yil 11 mart kunidagi “Keksa avlod vakillarini har tomonlama qo'llab-quvvatlash hamda ularning ijtimoiy faolligini oshirishga doir qo'shimcha chora-tadbirlar to'g'risida”gi 92-sonli qarorlarida belgilangan vazifalar ijrosini ta'minlash maqsadida “Nuroniy” jamg'armasi Asaka tumani bo'limi tomonidan davlat va jamoat tashkilotlari bilan hamkorlikda bir qator tadbirlar amalga oshirilmoqda.
Mahallalarda oilalar va yoshlar bilan ish olib borishda “Nuroniylar jamoatchilik kengashi” a'zolari, tumandagi 76 ta mahalla raislari va mahallalardagi “Keksalar maslahati” guruhi raislari ishtirokida hamkor tashkilotlar mas'ul xodimlari bilan kengaytirilgan yig'ilish o'tkazilib, asosiy vazifalar belgilab olindi.
Shundan kelib chiqib, olib borilgan amaliy ishlar doirasida 65 nafar ajrim yoqasidagi yosh oila 65 nafar, 66 ta ta'lim muassasasiga 3 nafardan, jami 198 nafar nuroniy biriktirilib, yil boshidan buyon ushbu faol nuroniylar o'z zimmalariga yuklangan vazifalarni sidqidildan ado etib kelmoqdalar. Jumladan, “Bir nuroniy — o'n yoshga mas'ul” tamoyili doirasida 203 nafar nuroniyga 1996 nafar yosh biriktirilgan bo'lsa, hozirda ularning 1714 nafari muammoli yoshlar toifasidan chiqarilgan. “Bir nuroniy — o'n yoshga mas'ul” ko'rik-tanlovida “Niyozbotir” MFY “Keksalar maslahati” guruhi raisi Shermamat ota Madaminov tumanda 1- o'rinni egallab, viloyat boskichida faol ishtirok etdi va 4-o'rinni egalladi.
Tumandagi davlat va jamiyat taraqqiyotiga munosib hissa qo'shgan obro'-e'tiborli keksalar, O'zbekiston Kahramonlari, davlat mukofotiga sazovor faxriylar ishtirokida korxona va tashkilotlarda, ta'lim muassasalarida o'tkazilayotgan “Uch avlod uchrashuvi” tadbirlari yoshlar uchun ham, keksa avlod vakillari uchun ham birdek manfaatli bo'lmoqda.
“Qadriyat” MFYda joylashgan musiqa va sanat maktabida o'tkazilgan “Qo'sha qarish saodati” ma'naviy-marifiy tadbiri ham ulkan taassurotlarga boy bo'ldi. Qo'sha qarish saodatiga erishgan 5 ta oila vakillarining ibratli hayoti, ularning jamiyatda tutgan o'ziga xos o'rni xususida fikr yuritilib, faxriy otaxonu onaxonlar yosh va o'rta avlod vakillariga o'zlarining insoniylik saboqlarini berdilar.
“Yashil makon” umummilliy loyihasida tumandagi 1100 nafar keksa nuroniylar 150 ming tup mevali va manzarali ko'chatlar ekib, yoshlarga chin ma'noda ibrat bo'lishdi.
O'tgan yili sentyabr-oktyabr oylarida “G'ayratli keksalar” shiori ostida o'tkazilgan sport musobaqalari nuroniylar o'rtasida sog'lom turmush tarzini targ'ib etishda o'ziga xos ahamiyatga ega bo'ldi. Mazkur tadbirlarda 500 dan ziyod mehnat faxriylari sportning shaxmat, shashka, stol tennisi va DARTS turlari bo'yicha o'zaro bellashdilar. 24 nafar g'olib qimmatbaho sovg'alar bilan taqdirlandi. Nuroniylarimiz uchun “G'ayratli keksalar” sport musobaqalari, chin ma'noda, g'ayrat-shijoat bellashuvlariga aylanmoqda.
2025 yilda “Keksalar haftaligi” doirasida “Hech kim mehr va e'tibordan chetda kolmasin!” shiori ostida o'tkazilgan tadbirlarda 345 nafar uyda yotgan bemorlar, ehtiyojmand keksalar, kasalxonalarda davolanayotgan keksalar, o'zgalar yordamiga muhtoj yakka-yolg'izlarga muruvvat ko'rsatilib, ularning holidan xabar olindi, uylarida hasharlar tashkil qilindi. 50 nafar yakka-yolg'iz nuroniy “Beshchashma”, 30 nafar nuroniy “Bobur” sihatgohida o'z salomatligini tiklab qaytdi. 11 nafar keksa nuroniyga nogironlik aravachalari, 8 nafariga eshitish moslamasi berildi. Bu ezgu va xayrli ishlarni yana davom ettiryapmiz.
“Keksalar uchun turizm” oyligi davomidagi tashabbuslarni ham o'ziga xos deyish mumkin. 2260 nafar nuroniy tumandagi madaniy meros ob'yektlariga, ziyoratgohlarga, viloyatdagi “Bobur bog'i” kabi qadamjolarga, 50 nafar nuroniy Namangan shahriga, 110 nafardan ziyod asakalik nuroniy otaxonu onaxonlar Samarqand, Buxoro, Xiva shaharlariga sayohatga bordilar.
Keksalar salomatligini asrash maqsadida tizimli tarzda mahallalarda, oilaviy, ko'p tarmoqli hamda tuman poliklinikalarida, qishloq vrachlik punktlarida 22019 nafar keksalar bepul tibbiy ko'rikdan o'tkazildi. Kasallik aniqlangan 22 nafar nuroniyga viloyat shifoxonalarida davolanish uchun order olib berildi. Bemorlarga zarur tibbiy yordamlar ko'rsatildi. 350 nafardan ortiq keksaga dori-darmon bepul tarqatildi. To'g'ri ovqatlanish, uzoq umr ko'rish sirlariga bag'ishlangan davra suhbatlari o'tkazildi. Shu bilan birga, “Biz — sog'lom turmush tarafdorimiz”, “Sog'lom hayot — sog'lom kelajak”, “Sog'lom hayot uchun 5000 qadam” kabi tadbirlarning muntazam tashkil qilinayotganligi nuroniylar salomatligini mustahkamlashda samarali omillardan bo'lib xizmat qilmoqda.
O'zbekiston Respublikasi Prezidentining 2024 yil 25 noyabrdagi “Kambag'allikdan — farovonlik sari” dasturini amalga oshirishga faol nuroniylarni jalb etish chora-tadbirlari to'g'risida”gi 405-sonli qarori ijrosini ta'minlash yuzasidan amalga oshirilayotgan ishlarni ham alohida qayd etish mumkin. Ushbu qaror ijrosi doirasida tumandagi 76 ta mahallada 3 nafardan, jami 228 nafar faol nuroniy tanlab olingan bo'lib, ularning har biriga 5 nafardan, jami 1140 ta kambag'al, ijtimoiy yordamga muhtoj oilalar biriktirilgan. Ayni vaqtda ushbu faol nuroniylar o'zlariga biriktirilgan oilalar bilan yaqindan ishlab, ularning ijtimoiy-iqtisodiy ahvolini yaxshilash bo'yicha manzilli chora-tadbirlarni amalga oshirmoqdalar. Amaliy sa'y-harakatlar natijasida 865 ta oila kambag'allik reestridan chiqarilgan.
Bir so'z bilan aytganda, hozirda tubdan yangilanishlar va o'ziga xos yutuqlar makoniga aylangan Asaka tumanining faol nuroniylari islohotlar bilan qadamba-qadam, zimmalariga yuklangan sharafli vazifalarni yuqori mas'uliyat va talabchanlik bilan ado etib, el-yurt manfaatlari yo'lida kamarbasta bo'lib kelmoqdalar.
Isroiljon Sultonov,
“Nuroniy” jamg'armasi
Asaka tumani bo'limi raisi.