Insoniyat taraqqiyotidagi har bir yuksalish, buyuk kashfiyot va madaniy uyg'onish zamirida ilm hamda mutolaa qudrati bor. Bular insonning ichki olamini boyitadi, notiqlik madaniyatini rivojlantiradi. Kitob bilan oshno bo'lgan inson voqea-hodisalarga chuqurroq nazar tashlaydi, hayotiy masalalarni tezroq anglaydi va mustaqil fikr yuritishga o'rganadi. Ayniqsa, biz, yoshlarning shaxs sifatida shakllanishimizda kitobning o'rni beqiyos.
Ilm-fan rivojini ham mutolaasiz tasavvur qilib bo'lmaydi. Dunyoni o'zgartirgan har bir olim yoki ixtirochi zafar cho'qqisiga chiqishdan avval minglab sahifalarni varaqlagan, izlangan. Imom Buxoriy, Abu Ali ibn Sino, Al-Xorazmiy, Mirzo Ulug'bek kabi buyuk ajdodlarimiz aynan tinimsiz izlanish va mutolaa orqali jahon sivilizatsiyasiga tamal toshini qo'yganlar. Yaqinda hayotimda yuz bergan bir quvonchli voqea menda ushbu fikrlarni yanada mustahkamladi.
O'zbekistonda xizmat ko'rsatgan jurnalist, O'zDJTU dotsenti, “Sog'lom ona va bola” ayollar va yoshlarni qo'llab-quvvatlash markazi rahbari Ra'no Zaripova mas'ulligida Parlament komissiyasi tomonidan ajratilgan “Mutolaa, ilm — baxt kaliti” nomli davlat granti doirasida talabalar o'rtasida tanlov o'tkazildi. O'zbekiston davlat jahon tillari universiteti Xalqaro jurnalistika fakulteti rahbariyati bilan hamkorlikda tashkil etilgan ushbu bellashuv yashil iqtisodiyot yo'nalishidagi sara videoroliklar ijodkorlarini aniqlashga qaratildi.
Mazkur loyiha bo'lajak jurnalistlarni raqamli texnologiyalarni puxta o'zlashtirishga va zamonaviy media olamiga chuqurroq kirib borishga undadi. 1-, 2-, 3-o'rin sohiblariga Xalqaro jurnalistika fakulteti rahbariyati tomonidan kitoblar to'plami sovg'a qilindi.
Ustozlarimiz tashabbusi bilan tez-tez tashkil etilayotgan bu kabi tanlovlar har birimizga o'zgacha kuch bag'ishlamoqda. O'z o'rnida, talabalarga ko'rsatilayotgan rag'bat va e'tirof esa biz yoshlarga katta mas'uliyat yuklaydi..
Sevinch TOShMUHAMMADOVA,
O'zDJTU talabasi.