Bugungi kunda mamlakatimizda kechayotgan oqilona islohotlarni hayotga teran tatbiq etish, ularning samaradorligini ta'minlashda faol nuroniylarimizning hissalari katta bo'lmoqda.
“Nuroniy” jamg'armasining Surxondaryo viloyati Uzun tumani bo'limi tomonidan ham keksa faxriylarning ijtimoiy faolligini oshirish, salomatliklarini muhofaza qilish, umrlariga umr qo'shish, aholi farovonligini ta'minlash, yosh avlod ta'lim-tarbiyasida ularning oltinga teng tajribalaridan unumli foydalanishga ustuvor vazifalardan biri sifatida qaralmoqda.
Uzun tumanida 186311 nafar aholi istiqomat qiladi. Shundan, 96881 nafari erkaklar, 86430 nafari ayollarni tashkil qiladi. Yoshga doir keksa nuroniylar 15081 nafar, front orti mehnat faxriylari 36 nafar, 100 yoshdan oshganlar 10 nafar, yakka-yolg'iz keksalar esa 29 nafardan iborat.
“Bir nuroniy — o'n yoshga mas'ul” tamoyiliga ko'ra, har yili tumandagi mavjud mahallalarning faol nuroniylariga 10 nafardan muammoli yoshlar biriktirilib, ularning muammolariga yechim topilmoqda. Bu yil ham 93 nafar nuroniyga 930 nafar muammoli yosh biriktirilgan bo'lib, amaliy sa'y-harakatlar natijasida ularning 222 nafari muammoli yoshlar toifasidan chiqarilgan. Shuningdek, “Nuroniy — har bir oilaga mas'ul” tamoyili asosida 82 nafar nuroniyga 82 ta muammoli oila biriktirilib, hozirda ishlar davom ettirilmoqda. 107 nafar faol nuroniyga kambag'allik reestrida turuvchi 472 ta oila biriktirilgan. Ushbu oilalarni kambag'allikdan chiqarish bo'yicha choralar ko'rilib, xonadonlar bilan yaqin hamkorlikda ish olib borilmoqda.
Nuroniylarni jismoniy tarbiya va sport bilan qamrab olish masalasi ham asosiy kun tartibidan joy olgan. “Sog'lom hayot uchun 5 ming qadam” yurish marafoni hamda ommaviy badantarbiya mashg'ulotlari muntazam tashkil etiladigan o'ziga xos sport an'anasiga aylangan.
Tumanning “Ittifoq” mahallasida istiqomat qiluvchi faol nuroniylarning sport yo'nalishida erishgan natijalari nafaqat mahallada, balki butun viloyat va mamlakat miqyosida sport sohasida amalga oshirilayotgan islohotlar mevasi sifatida qayd etilmoqda. 1964 yilda tug'ilgan Muxtorjon Umarov Osiyo chempionatlarida yugurish bo'yicha qator natijalarga erishgan. Masalan, u Chimkent va Toshkent shaharlarida kechgan Osiyo chempionatida 4-o'rinni, Samarqand shahridagi Osiyo chempionatida 1-o'rinni, Andijon shahridagi chempionatda esa 1-o'rinni qo'lga kiritgan.
1960 yilda tug'ilgan Sharofiddin Amanov ham sport bo'yicha o'z yo'nalishida yuqori natijalarga erishgan. 2018 yilda Toshkentda bo'lib o'tgan Osiyo chempionatida faxrli 3-o'rinni, 2021 yilda Toshkentdagi chempionatda
3-o'rinni qo'lga kiritgan. Bundan tashqari, 2023 yilda Toshkentda o'tgan Osiyo chempionatida yugurish bo'yicha 2-o'rinni egallagan.
“Nuroniy” jamg'armasining tuman bo'limi tashabbusi bilan hamkor idora va tashkilotlar bilan birgalikda o'tkaziladigan “Uch avlod uchrashuvi”, “Qo'sha qarish saodati”, “Faxriylar — faxrimiz”, “Yuz bilan yuzlashganlar”, “Bir nuroniy — o'n yoshga mas'ul” va yana qator ma'naviy-ma'rifiy tadbirlar, chinakam ma'noda, yoshlarga insoniylik saboqlari bo'lib xizmat qilmoqda. Xususan, “Karashik” mahallasidagi 12-sonli umumta'lim maktabida o'tkazilgan “Uch avlod uchrashuvi” tadbirida “Nuroniy” jamg'armasi Uzun tumani bo'limi raisi Bo'ri Toshboyev ishtirok etib, yoshlarning ongi va tafakkurini yuksaltirish, intellektual, kasbiy salohiyatini oshirish, Vatan himoyasi, uning hududiy daxlsizligini ta'minlash, davlat va jamiyat xavfsizligi uchun hamisha shay turish, vatanparvar, xalqparvar bo'lish lozimligini alohida ta'kidladi. Tadbirda keksa va o'rta avlod vakillaridan tashqari yoshlarning ham yutuqlari e'tirof etildi. Jumladan, 2008 yilda tug'ilgan Paralimpiya bo'yicha 3 karra jahon chempioni Hojiakbar O'roqov o'z yutuqlari haqida gapirib, tengqurlarini, barcha yoshlarni asosiy maqsad yo'lida dadil harakat qilishga undadi.
“Keksalar uchun turizm” loyihasiga ham alohida e'tibor qaratilgan. “Madaniy turmush” mahallasining bir guruh otaxonu onaxonlari So'fi Olloyor bobo qadamjosini ziyorat qilib, ulug' alloma hayoti va faoliyatiga oid bilimlarini yanada boyitdilar. Shu kungacha tuman nuroniylari bilan qator ziyoratgohlar va diqqatga sazovor joylarga ziyorat hamda sayohat tadbirlari uyushtirildi. Ular ushbu e'tibor uchun davlatimiz rahbariga o'z minnatdorliklarini izhor qilgan holda, yurtimiz tinchligi, xalqimiz farovonligini so'rab, duolarga qo'l ochmoqdalar.
— Ish faoliyatimizda O'zbekiston Respublikasi Prezidentining 2022 yil 15 martdagi “Nuroniylarni har tomonlama qo'llab-quvvatlash, ularning turmush darajasini oshirishga doir qo'shimcha chora-tadbirlar to'g'risida”gi 167-sonli, 2023 yilda 11 martdagi “Keksa avlod vakillarini har tomonlama qo'llab-quvvatlash hamda ularning ijtimoiy faolligini oshirishga doir qo'shimcha chora-tadbirlar to'g'risida”gi 92-sonli qarorlari va yana qator hujjatlar dasturilamal bo'lib xizmat qilmoqda, — deydi “Nuroniy” jamg'armasi Uzun tumani bo'limi raisi Bo'ri Toshboyev. — Har bir ishda sarhisob, tahlil va xulosalar bo'lishi kerak. Shu maqsadda, tumanimizdagi mavjud mahallalarda ish olib borayotgan nuroniylar faoliyatini doimiy tahlil qilib boramiz. Bu, albatta, tajriba almashish va ishimiz samardorligini oshirishda muhim ahamiyat kasb etadi. Yaqinda “Yangi ro'zg'or” mahallasida ish olib borayotgan faol nuroniylar bilan uchrashuv o'tkazib, ularning faoliyatini o'rgandik. Mahallaning faol nuroniylari O'ktam Rahmonov, O'rmon Rahmonovlarning amalga oshirgan ishlari, yani ularning “Bir nuroniy — o'n yoshga mas'ul”, “Bir muammoli oilaga bir nuroniy mas'ul”, “Kambag'allikdan — farovonlik sari” tamoyillari bo'yicha ishlash tajribasi ko'rib chiqildi. O'rganish va amaliy yordam ko'rsatish tadbirlari davomida ularning erishayotgan yutuqlari e'tirof etilib, o'z navbatida, amalga oshirilishi lozim bo'lgan vazifalar yuzasidan ko'rsatma hamda tavsiyalar ham berildi.
Yuqoridagilardan kelib chiqib, aytish mumkinki, bugungi kunda Uzun tumanida faol nuroniylar ishini tashkil etish borasidagi tadbirlar aniq reja va dasturlar asosida olib borilmoqda. Bu esa amalda kutilgan samaralarni berib, nuroniylarning ijtimoiy-siyosiy, madaniy hayotimizdagi hal qiluvchi o'rnini yanada mustahkamlamoqda. Zero, amalga oshirayotgan bu kabi ishlardan bosh maqsadimiz, nuroniylarimizning faolligini oshirishdir.
Foziljon Toshquvvatov,
Uzun tumani.