Mamlakatimizda “Uch avlod uchrashuvi” tadbirlarini o'tkazish an'anaga aylanib ulgurgan. Mazkur tadbirlar keksa, o'rta va yosh avlod o'rtasida o'ziga xos ma'naviy ko'prik vazifasini o'tab, yosh avlodni barkamol etib tarbiyalashda hal qiluvchi tashabbuslardan bo'lmoqda. Ushbu tadbirlar doirasida ulkan hayot va mehnat tajribasiga ega bo'lgan nuroniy otaxonu onaxonlar o'rta va yosh avlod vakillariga o'zlarining oltinga teng maslahat va tavsiyalarini bermoqdalar.
Uch avlod vakillarining navbatdagi uchrashuvi Mirzo Ulug'bek nomidagi O'zbekiston Milliy universitetida O'zbekiston faxriylarining ijtimoiy faoliyatini qo'llab-quvvatlash “Nuroniy” jamg'armasi bilan hamkorlikda o'tkazildi. Tadbirni universitet rektori Inom Madjidov kirish so'zi bilan ochib, uch avlod vakillarining bir davrada jam bo'lishi ma'naviy davomiylikni ta'minlashda muhim ahamiyat kasb etishini ta'kidladi.
Uchrashuvda “Nuroniy” jamg'armasi respublika Boshqaruvi raisi, O'zbekiston Qahramoni, senator Sodiqjon Turdiyev ishtirok etdi. U o'z nutqida milliy birlik va umummilliy qadriyatlarning jamiyatda mustahkamlanishi bugun har qachongidan ham muhimroq ahamiyat kasb etayotganini ta'kidlab turib, mamlakatimizda amalga oshirilayotgan islohotlar va belgilangan strategik ustuvor vazifalarning hayotiyligini ta'minlash faqat davlatninggina emas, balki keng jamoatchilikning zimmasida ekani, bu jarayonda keksa ham, yosh ham birdek daxldorlikni his etishi lozimligini qo'shimcha qildi.
Shuningdek, tadbirga mehnat faxriylari, davlat va jamoat tashkilotlari vakillari hamda universitet faxriy professor-o'qituvchilari taklif etildi.
Muloqot davomida O'zFA akademigi Abdulla A'zamov, taniqli jurnalist Ahmadjon Meliboyev hamda universitetning ko'zga ko'ringan olimlari — Mersaid Aripov, Nigina Shermuhammedova, Ne'mat Norqulov va Xurshid Toshovlar so'zga chiqdilar. Ular o'z hayot yo'llari, ilm-fan sohasidagi mashaqqat va zafarlari haqida so'zlab, talabalarni yurt taraqqiyoti yo'lida fidoyi bo'lishga chorladilar.
Xususan, barcha sohada kadrlar salohiyatini yuksaltirish, ilm-fan va madaniyat rivojiga hissa qo'shish, bobolarimizning ilmiy merosini chuqur o'rganish, ilm-fan sohasida xalqaro tajribalardan unumli foydalanish to'g'risida yoshlarga ko'rsatma berildi. Bugun zamon sur'at bilan rivojlanayotgan va davr shiddat bilan o'zgarayotgan tahlikali bir paytda, milliy o'zlikni anglash, milliy tamaddun va tarixni puxta o'zlashtirish zarurligi ta'kidlandi.
Darvoqe, yoshlar tarbiyasida, ularning ma'naviy kamolotida donishmand nuroniylarning boy hayot tajribasidan foydalanish, keksalarning el-yurtimiz ravnaqi yo'lidagi uzoq yillik mehnat faoliyati bilan yoshlarni yaqindan tanishtirish, ularni vatanparvarlik, yurt taqdiriga daxldorlik, ma'rifatparvarlik va sadoqat ruhida tarbiyalashni maqsad qilgan turkum uchrashuvlar pirovardida ijobiy natija bermoqda. Avvalo, katta avlod o'z hayotiy tajribasi, urf-odatlar va qadriyatlarni yoshlarga yetkazishi ortidan yoshlar tarixiy xotira va madaniy merosni chuqurroq anglay boshlamoqda. Qolaversa, avlodlar o'rtasidagi bog'liqlikni mustahkamlash, ijtimoiy birdamlikni kuchaytirish, milliy “immunitet”ni shakllantirish, keksalarning ijtimoiy faolligini oshirish va davlat siyosatini qo'llab-quvvatlashga xizmat qilmoqda.
Ilhom ABDUSALOMOV.