O'zbekiston Respublikasi Prezidentining “9 may — Xotira va qadrlash kuniga tayyorgarlik ko'rish va uni o'tkazish chora-tadbirlari to'g'risida”gi qaroriga ko'ra, mamlakatimizning barcha hududlarida ushbu sana keng nishonlanmoqda.
Toshkent viloyati Ohangaron shahridagi “Xonobod” mahallasida ham “Burch, jasorat, matonat!” shiori ostida insoniylik va vatanparvarlikning yuksak namunasini ifoda etgan “Uch avlod uchrashuvi” o'tkazildi. Unda Afg'on urushida mardlarcha halok bo'lgan harbiy desant qo'shini oddiy askari Akrom Karimov xotirasi yodga olindi.
Tadbirda Ohangaron shahar hokimi Sadriddin Shoqosimov, nuroniylar, Afg'on urushi faxriylari hamda yoshlar qatnashishdi.
Tadbirda so'zga chiqqanlar mamlakatimizda inson qadrini ulug'lash, xotirasiga yuksak ehtirom ko'rsatish, yoshi ulug' faxriylarni e'zozlash, ularning ijtimoiy va ma'naviy faoliyatini qo'llab-quvvatlash davlat siyosatining ustuvor yo'nalishiga aylanganini alohida ta'kidladilar.
Nuroniylar o'z hayotiy tajribasi haqida so'zlab, yoshlarni bugungi tinch va dorilamon kunlar, yaratilgan imkoniyatlarning qadriga yetishga chorlashdi. Tadbir davomida marhum Akrom Karimov haqiga duo qilinib, oila a'zolariga ehtirom ko'rsatildi.
Shavkat Komilov,
“Nuroniy” jamg'armasi
Ohangaron shahar bo'limi raisi.