Surxondaryo viloyatining Qumqo'rg'on tumanidagi “Besh qahramon” mahallasida istiqomat qilayotgan, bugun tabarruk 80 yoshni qarshilagan, Yangi O'zbekistonimizning ardoqli onaxonlaridan biri Obod aya Abdullayevaning xonadonidan mehmonlarning qadami uzilmaydi.
Obod aya bilan suhbatlashsangiz, hayotning ne-ne mashaqqatlarini yengib, yurtimiz koriga yaraydigan farzandu nabiralarni tarbiyalab, ularni safga qo'shgan, uzoq yillar el-yurtimiz ravnaqi yo'lida mehnat qilib, hurmat-ehtiromga erishgan qalbi ham, yuzi ham nurli onaxonning ichki olamini kashf etaverasiz…
Asli kasbi shifokor bo'lgan Obod aya o'z umr daftarini zarhal bitiklar bilan bezab kelmoqda. U opalari Mahmuda va Maqsuda ayalar izidan borib, tibbiyot oliygohida tahsil oldi, tajribali shifokor bo'lib yetishdi. Fidoyi mehnati, qobiliyati va maqsad sari intilishdagi shijoati bilan ko'plarga ibrat bo'ldi. Qumqo'rg'on tumani tashkil topgan davr — 1977 yilda uni partiya qo'mitasi kotibi lavozimiga tavsiya etishdi. Shifokor ayol bu ishonchni uzoq yillar sidqidildan ado etib keldi. Sobiq ittifoq davrida yagona hisoblangan bu xo'jalikdan 5 nafar hamyurtimiz 1 yilda bir farmon bilan Moskvadan “Mehnat Qahramoni” ynvoniga sazovor bo'lib, “Oltin yulduz” taqqan edi. Bunday dovrug'i ketgan xo'jalikda mas'uliyatli vazifada ishlash oson kechmasdi, albatta.
Obod Abdullayeva hamisha sidqidildan mehnat qildi, oromidan kechdi va el-yurt hurmatiga erishdi. Keyinchalik faoliyatini o'z mutaxassisligi bo'yicha davom ettirib, Qumqo'rg'on tumani DSENM bosh shifokori bo'lib ishladi.
31 yoshida uning nomzodi tuman partiya qo'mitasiga mafkura ishlari bo'yicha kotib vazifasiga munosib ko'rildi. Nafaqaga chiqqunga qadar uzoq yillap davomida “Oqjar” qishloq fuqarolar yig'iniga raislik qildi. Qaysi coha, qaysi lavozimda ishlamasin, hamisha el-yurt manfaatini o'z manfaatidan ustun qo'ydi.
— Mamashukur Choriyev va Obod hoji opa Abdullayevalar tiklagan oila tumandagi ibratli xonadonlardan hisoblanadi, — deydi Surxondaryo viloyati Qumqo'rg'on tumani hokimining keksalar bo'yicha maslahatchisi, “Nuroniy” jamg'armasi tuman bo'limi raisi Boymurod Abdimo'minov. — Farzandlarining hammasi oliy ma'lumotli, el-yurt xizmatida. Qizlar Nasiba va Saodat — muallima, o'g'li Abdulhafiz shifokor, kenjalari Gulshoda esa hisobchi-tadbirkor… Obod opa otasi Mamajon Abdullayevdan chinakamiga duo olgan bo'lsa, o'g'li Abdulhafiz otasi Mamashukur Choriyevning duosiga musharraf bo'lgan. Otasi to'satdan yurak xurujiga uchrab, to'shakka mixlanganda o'g'li Abdulhafiz Toshkentdagi neyroxirurgiya markazidagi faoliyatini to'xtatib, hattoki, akademik Marat Qoriyev rahbarligidagi ilmiy-tadqiqot ishlarini ham chetga surib, o'z vaqtini otasini parvarishlashga bag'ishladi. Bu haqda uning o'zidan so'rasangiz, “Eng muhimi, otam umrining bir necha yilga uzaytirishga erishganimizdan, ota-onamga foydam tegayotganligidan baxtliman”, — deydi u.
Obod ayaning tabarruk yoshga to'lishi munosabati bilan mutasaddilar onaxonning xonadoniga borib, “Nuroniy” jamg'armasi respublika Boshqaruvi raisi, O'zbekiston Qahramoni, senator Sodiqjon Turdiyevning tabrigini yetkazdilar.
Darhaqiqat, ezgulikning mukofoti faqat ezgulikdir. Umrini el-yurtga xizmat qilish, Vatan uchun komil farzandlarni tarbiyalab, ularni ulug' ishga safarbar etishga bag'ishlagan insonlar hayotining go'zal, farovon va ibratli bo'lishiga aslo shubha yo'qdir. Yurtimizda Obod aya Abdullayeva kabi tabarruk onaxonlarimiz bor ekanlar, elimizning ertasi yorug', kelajagi ishonchli qo'llarda, albatta.
Akbar Safarov,
“Nuroniy” jamg'armasi Surxondaryo viloyati
Qumqo'rg'on tumani bo'limi mutaxassisi.