Mamlakatimizda yoshlarni Vatanga sadoqat, milliy qadriyatlarga hurmat, tinchlik va totuvlik ruhida tarbiyalash davlat siyosati darajasiga ko'tarilgan. Jamiyat taraqqiyoti, ma'naviy barkamol avlodni voyaga yetkazishda keksalarning, nuroniylarning fidokorona mehnati, sabr-toqati, ibratli umr yo'li yoshlar uchun haqiqiy hayot maktabi hisoblanadi. Shu bois, bugungi kunda keksalarning ijtimoiy faolligini qo'llab-quvvatlash, ularni faol hayotga jalb etish va yosh avlod tarbiyasidagi o'rnini yanada yuksaltirishga alohida e'tibor qaratilmoqda.
Xususan, O'zbekiston Respublikasi Prezidentining 2022 yil 19 yanvarda qabul qilingan “Mahallalarda yoshlar bilan ishlash tizimini tubdan takomillashtirish chora-tadbirlari to'g'risida”gi 92-sonli Qarori ijrosi doirasida bugungi kunda qator amaliy ishlar olib borilmoqda. Ushbu Qaror yoshlar bilan ishlashning yangi, ta'sirchan mexanizmlarini joriy etish, mahallalarda ma'naviy-ma'rifiy muhitni qaror toptirishga qaratilgani bilan ahamiyatlidir. Ayni vazifalar ijrosi doirasida mahallalarda, ta'lim maskanlarida, oliy o'quv yurtlarida faxriy nuroniylar, jamoatchilik faollari ishtirokida “Qahramonlar va yoshlar uchrashuvi” kabi tadbirlar tashkil etilmoqda.
Toshkent davlat iqtisodiyot universitetida uzoq yillar davomidagi samarali mehnatlari bilan mamlakatimizning ijtimoiy-iqtisodiy taraqqiyotiga, ma'naviy-ma'rifiy sohalar rivojiga munosib hissa qo'shgan va ayni paytda ham jamiyat hayotida faol ishtirok etib kelayotgan O'zbekiston Qahramonlarining yoshlar bilan uchrashuvi bo'lib o'tdi.
Mazkur tadbirda O'zbekiston Qahramonlari — “Nuroniy” jamg'armasi respublika Boshqaruvi raisi, senator Sodiqjon Turdiyev, faxriy senator, professor Shukurjon Mamatqulov, shuningdek, mehnat faxriylari, nuroniylar, davlat va jamoat tashkilotlari vakillari, professor-o'qituvchilar hamda talabalar ishtirok etdilar.
Uchrashuv avvalida universitet rektori, iqtisod fanlari doktori, professor To'lqin Teshabayev so'zga chiqib, tadbir ahamiyatiga to'xtalar ekan, o'rta va yosh avlod vakillarining o'qish hamda ish faoliyatida yuqori samaradorlikka erishishida, milliy o'zlik va umuminsoniy qadriyatlarga sodiq qolishida nuroniylarning hayotiy saboqlari, maslahat va o'gitlari ko'p jihatdan asqotishini ta'kidladi.
Tadbirda O'zbekiston Qahramonlari Sodiqjon Turdiyev va Shukurjon Mamatqulovlar so'zga chiqib, so'nggi yillarda yuz berayotgan o'zgarishlar ortidan hamyurtlarimizning yashash tarzi o'zgarayotgani, yaratilayotgan imkoniyatlar yangidan-yangi vazifalarni kun tartibiga chiqarayotgani, ayni vaqtda faol nuroniylar, soha mutaxassislari, yoshlar ishtiroki hamda ular o'rtasidagi hamkorlikning har qachongidan-da muhim ahamiyat kasb etishini ta'kidlab o'tdilar. Jamiyatni yuksaltirish yo'lida ilg'or fikrli, tashabbuskor yoshlarga ehtiyoj sezilishi, buning uchun, eng avvalo, ularning ta'lim-tarbiyasi va shaxsiy rivojlanishiga alohida e'tibor qaratish zarurligini aytib o'tishdi. Shuningdek, O'zbekiston Qahramonlari o'z sohasini mukammal o'rganib, sidqidildan mehnat qilish, Vatanga muhabbat, sadoqat, shukronalik tuyg'ulari, ilm olishga intilish, milliy qadriyatlarga hurmat har bir insonni el-yurt e'zozi va ehtiromiga yetkazishini hayotiy misollar bilan gapirib berishdi. O'z navbatida, talabalar ham qahramonlardan o'zlarini qiziqtirgan savollarga javoblar oldilar.
Uchrashuv davomida universitetning Faxriylar kengashi raisi, professor Ismoil Soifnazarov hamda faol talaba-yoshlar so'zga chiqib, o'z fikrlarini bildirdilar. Tadbir yakunida “Nuroniy” jamg'armasi tomonidan universitet professor-o'qituvchilari hamda faol talabalarga esdalik sovg'alari, kitoblar taqdim etildi.
Sug'diyona Sobirova,
“Nuroniy” muxbiri.