Qo'sha qarish saodati — yuksak insoniylik dorilfununi hisoblangan mahalla, kamolot beshigi sanalgan oilalarda qaror topgan bebaho qadriyatlardan biridir. Ushbu ne'mat bor oilada tinchlik-xotirjamlik, fayzu baraka hukm suradi, farzandlar komil insonlar bo'lib ulg'ayadilar. Ma'naviyatu ma'rifatda barchaga ibrat bo'lgan ota-onalarining izlaridan borib, el-yurtga munosib xizmat qiladilar.
“Nuroniy” jamg'armasi Navoiy viloyati Karmana tumani bo'limi tashabbusi bilan 2-politexnikum faollar zalida 50 yil va undan ziyod vaqt birga turmush kechirib, oila atalmish qo'rg'onni muqaddas bilgan, turmush mashaqqatlarida toblangan va bugungi kunda birga umrguzaronlik qilib kelayotgan nuroniy otaxonu onaxonlar hamda yoshlar ishtirokida tashkil qilingan “Qo'sha qarish saodati” tadbiri, o'z mazmuniga ko'ra, chinakam ma'noda, ibrat sabog'i bo'ldi deyish mumkin.
Darhaqiqat, nuroniylar yurtimizning eng aziz, eng ulug' va mo''tabar kishilaridir. Keksalar yo'li doimo porloq. Tafakkur bulog'i bamisli xazina, o'zlari esa mehru saxovat timsolidirlar. Nuroniylar ota-yu onaday ulug', shu sabab ular hamisha davraning to'riga, hurmatning zo'riga munosib ko'riladilar. Bu bejiz emas, albatta.
Yoshlar tadbir davomida keksalik gashtini surayotgan va uzoq vaqt birga umrguzaronlik qilib kelayotgan nuroniy otaxon va onaxonlarning oltinga teng o'gitlaridan bahramand bo'lib, o'z oldilaridagi maqsad-vazifalarini yanada aniq belgilab oldilar.
Tadbirda “Nuroniy” jamg'armasi Karmana tumani bo'limi raisi O'tkir Rajabov, Nuroniylar jamoatchilik kengashi, “Buvijonlar maktabi” a'zolari, mahalla fuqarolar yig'inlaridagi “Keksalar maslahati” guruhi raislari, faol nuroniylar, politexnikum o'quvchi-yoshlari ishtirok etdilar.
San'atkorlar tomonidan ijro etilgan dilrabo kuy-qo'shiqlar davraga yanada fayz ulashdi.
Tadbir yakunida qo'sha qarish saodatiga erishgan otaxonu onaxonlarga mutasaddilar tomonidan esdalik sovg'alari topshirildi.
Quvonarlisi, harakatlar doirasida belgilab olingan qator tadbirlar buyruqni bajarish qabilida emas, balki turmush farovonligiga erishgan, baxtli, sog'lom fikrli, yuksak ma'naviyatli, madaniyatli, ijtimoiy faol jamiyatni shakllantirish va ularda mamlakat taqdiriga daxldorlikni kuchaytirish maqsadiga xizmat qilmoqda.
Janaroy Alimbayeva.
Nuroniylar – yashil maydonda
Yurtimizda “Nuroniylar — sport bilan hamnafas” shiori ostida keksa avlod vakillarining salomatligini mustahkamlash, ular o'rtasida sog'lom turmush tarzini keng targ'ib qilish hamda sportga bo'lgan qiziqishlarini yanada oshirish maqsadida o'tkazilayotgan sport tadbirlari va turli musobaqalar amalda o'zini oqlamoqda. Sport tadbirlari nuroniylarning g'ayratiga g'ayrat, kuchiga kuch qo'shib, ularni yanada sog'lom va bardam holga keltirayotganligi bugun ayni haqiqatdir.
Ohangaron shahrida nuroniylar o'rtasida mini-futbol bo'yicha o'tkazilgan “Toshkent viloyati kubogi” musobaqasida ushbu jihat yana bir karra yorqin aks etdi.
Mazkur musobaqa viloyat hokimligi, “Nuroniy” jamg'armasi hamda Sport boshqarmasi hamkorligida tashkil etildi. Unda viloyatning tuman va shaharlaridan tashrif buyurgan jamoalar ishtirok etdi. Sportchi nuroniylar yashil maydonda o'zaro do'stlik, hamjihatlik va sportga bo'lgan mehr-muhabbatlarini namoyon etdilar. Bahslar qizg'in va murosasiz, ayni paytda g'oyat samimiy kechdi.
Yakuniy natijalarga ko'ra, 3-o'rinni Bekobod shahri, 2-o'rinni Qibray tumani, faxrli 1-o'rinni esa Angren shahri jamoalari qo'lga kiritdilar.
G'olib va sovrindor jamoalar tashkilotchilar tomonidan diplom, kubok hamda esdalik sovg'alari bilan taqdirlandi.
U.Eshpo'latov.