Hayot insonga berilgan betakror ne'matdir. Bir martagina taqdim etiladigan oltin imkon. Uni mazmun bilan boyitish ham, yelga sovurish ham insonning o'ziga bog'liq. Yana bir haqiqat shuki, yaratgan egam odamzotga ham juft bo'lib yashash baxtini ato etgan. Muvaffaqiyatga erishish, inson degan nomga munosib tarix qoldirish ko'p jihatdan shunga ham bog'liq, albatta.
Agar inson umrini ulkan kemaga mengzaydigan bo'lsak, uni boshqarish uchun eshkakni barobar tortadigan yo'ldoshing bo'lishi kerak. Shunda hayot kemang o'zing istagan manzilga yetib bora oladi, ya'ni maqsadingga erishasan. Ma'lum bir manzilga yetib, ortingga qaraganingda, bekor yashamaganingni his qilishning o'zi katta baxt aslida.
Qashqadaryo viloyati Qarshi shahar “Aralovul” mahallasida yashaydigan mehnat faxriysi Po'lat Murtazayev va Shohida Yo'ldoshevalarning oilasi ana shunday baxtga erishgan xonadonlardan biri. Ellik yildan buyon baqamti, hamjihat bo'lib yashab kelayotgan bu oila vakillarini barchaga o'rnak qilib ko'rsatsak arziydi.
Po'lat Murtazayevni nafaqat qashqadaryoliklar, balki mamlakatimizning turli hududlaridagi nuroniylar yaxshi tanishadi. Po'lat aka “Nuroniy” jamg'armasi Qashqadaryo viloyati bo'limida hisobchi, viloyat bo'limi raisi o'rinbosari, ijrochi-direktor vazifalarida ishlagan. Hozirda viloyat hokimining faxriylar ishlari bo'yicha maslahatchisi yordamchisi sifatida faoliyat yuritmoqda.
1975 yilda Toshkent xalq xo'jaligi instituti (hozirgi Toshkent davlat iqtisodiyot universiteti)ning kunduzgi bo'limini tugatgan Po'lat aka uzoq yillardan beri viloyat miqyosida turli lavozimlarda samarali mehnat qilib kelmoqda. U mehnat faoliyatini G'uzor tumanidagi “Tohir-Zuhro Muqobil mashina traktor parki” 3-sonli bo'limida hisobchilikdan boshlagan bo'lsa, keyinchalik viloyat qishloq va suv xo'jaligi boshqarmasida bosh mutaxassis, Iqtisodiyot bosh boshqarmasining agrosanoat kompleksi bo'limi bosh mutaxassisi kabi vazifalarda samarali faoliyat yuritgan.
Turmush o'rtog'i Shohida aya Yo'ldosheva qirq yil davomida muallimlik kasbini ulug' tutib, yosh avlod ta'lim-tarbiya berdi. Bugungi kunda u Qarshi shahridagi “Aralovul” mahallasi raisining oila, xotin-qizlar ijtimoiy, ma'naviy masalalar bo'yicha o'rinbosari vazifasida ishlamoqda.
Oilada tarbiyalangan to'rt nafar farzand hayotda o'z o'rinlarini topib, yurt ravnaqiga munosib hissa qo'shib kelmoqdalar. Jumladan, to'ng'ich farzand Farhod Murtazayev Boysun tumanidagi “Inter injiniring GPZ” kompaniyasida bosh mutaxassis. Keyingi o'g'il Odil Murtazayev “Sho'rtangazkimyo” majmuasi muhandisi. Qizi Feruza Murtazayeva Qarshi shahridagi 19-sonli maktabda o'qituvchi. To'rtinchi farzand Suhrob Murtazayev “O'ztelekom” Qarshi shahar bog'lamasi boshlig'i vazifasida ishlaydi.
Shohida aya ish faoliyati davomida mahallasidagi xotin-qizlarning muammolarini aniqlash, hal etish, ularning ma'naviyatini yuksaltirishga munosib hissa qo'shib, xotin-qizlar bilan ishlash bo'yicha komissiya, “Ayollar maslahati kengashi”, “Ota-onalar universiteti” faoliyatiga ko'maklashish, xotin-qizlarni qo'llab-quvvatlash, ularga huquqiy, ma'naviy, axloqiy, psixologik, tibbiy maslahatlar berishda faol ishtirok etib kelayotir.
— O'n nafar nabiramiz bor. Ular hali maktabda o'qishadi, huquqshunoslik, axborot texnalogiyalari va iqtisodiyot yo'nalishlariga qiziqishlari yuqori, — deydi Po'lat aka Murtazayev. — Katta nabiram Firdavs Murtazayev bu yil 11-sinfni bitiradi. Kompyuter savodxonligi yuqori bo'lib, hozirdan oliy ta'lim dargohiga grant asosida kirish yo'llanmasini qo'lga kiritgan. Turmush o'rtog'im bilan avval farzandlarimiz kelajagi uchun qayg'urgan bo'lsak, endilikda nabiralarimiz kelajagi uchun harakatdamiz. Farzandlar, nabiralarning har bir yutug'i —bu bizning yutug'imiz. Qachonki, shularning biror yutuqqa erishganini ko'rsak, ulardan ham ko'ra ko'proq quvonamiz, umrimiz zoe ketmagani uchun Yaratganga shukronalar aytamiz… Jamiyatda boshi baland, ko'ksi tog' bo'lib, oilasidan, farzandlaridan ko'ngli to'lib yashash baxti hammaga ham nasib etaversin. Buning uchun, avvalo, inson o'ziga munosib umr yo'ldoshi topa olishi kerak. Hayot yo'li davomida, yaxshi-yomon kunlarda hammasiga sabr qilib, barobar harakatda bo'lib, yorug' kunlardan umid qilgan holda, yonidagi umr yo'ldoshiga ham ishonch ulashib yashay olgan inson, shubhasizki, baxtli odam sanaladi.
Po'lat akaning bu fikrlari yillar sinovlarida toblanib, amalda o'z isbotini topgan hayot xulosalaridir. Chindan ham, oilada ota-ona o'zaro hammaslak, hamqadam va ahil bo'lib yashar ekan, ular bunyod etgan oiladagi farzandlar ham barkamol, el-yurt uchun kerakli dilbandlar bo'lib ulg'ayadilar.
Asolat Ahmadqulova,
“Nuroniy” muxbiri.