Mamlakatimizda inson qadri, mahalla barqarorligi va jamiyat taraqqiyoti o'zaro uzviy bog'liq ustuvor yo'nalishlar sifatida belgilangan. Shundan kelib chiqib aytish mumkinki, davlatimiz rahbarining 2025 yil 26 dekabr kuni Oliy Majlis va O'zbekiston xalqiga yo'llagan Murojaatnomasida 2026 yilni “Mahallani rivojlantirish va jamiyatni yuksaltirish yili” deb e'lon qilish tashabbusi ana shu ustuvor siyosatning mantiqiy davomi bo'ldi.
Bu qaror, o'z o'rnida, mahallalarda aholi farovonligini oshirish, ijtimoiy hamjihatlikni mustahkamlash va inson manfaatlarini yanada yuqori pog'onaga olib chiqishga qaratilgan keng qamrovli islohotlar izchil davom ettirilishini anglatadi.
Albatta, ushbu jarayonlarda keksa avlod vakillarining o'rni beqiyos. Boisi, nuroniylar hayotiy tajribasi, ma'naviy salohiyati va jamoatchilikdagi nufuzi bilan mahalla va jamiyat barqarorligining tayanch ustunidir. Yurtimizda ularning ijtimoiy faolligini oshirish, munosib turmush sharoitini yaratish va faol jamoatchilik hayotiga jalb etishga qaratilgan tashabbuslar ko'lami tobora kengayayotgani kishini quvontiradi. Ayniqsa, joylarda barpo etilayotgan “Nuroniylar maskani” esa bu e'tiborning amaliy ifodasidir. Navoiy viloyatining G'ozg'on shahrida yangidan barpo etilgan “Nuroniylar maskani” ham hududda istiqomat qilayotgan keksa avlod vakillari uchun munosib hurmat va g'amxo'rlik timsoliga aylandi.
Majmuaning tantanali ochilish marosimida shahar sektori mutasaddilari, nuroniylar, faol jamoatchilik vakillari ishtirok etdi. Tadbirda so'zga chiqqan shahar hokimi N. Jo'rayev hamda “Nuroniy” jamg'armasi viloyat bo'limi raisi
Sh. Nabiyev mamlakatimizda keksa avlodga ko'rsatilayotgan e'tibor, davlat siyosati darajasida ularni qo'llab-quvvatlash va bu borada amalga oshirilayotgan ishlar samarasi haqida o'z fikrlarini bildirdi. E'tirof etish kerak, yangi maskan hududida nuroniylar uchun keng qamrovli va zamonaviy sharoitlar yaratilgan. Jumladan, xizmat xonalari, boy fondga ega kutubxona, sport, madaniy tadbirlar va ko'rgazmalar zali, tibbiy xizmat ko'rsatish hamda dam olish xonalari tashkil etilgan. Bu esa keksa avlod vakillarining sog'lom turmush tarzini olib borishi, ma'naviy hayotini boyitish va jamoatchilik ishlarida faol ishtirok etishi uchun mustahkam zamin yaratadi.
Marosim ishtirokchilari maskanda yaratilgan shart-sharoitlar bilan yaqindan tanishib, uning ahamiyatini yuqori baholadilar. Nuroniylar esa o'zlariga ko'rsatilayotgan e'tibor va g'amxo'rlik uchun Yurtboshimizga minnatdorchilik bildirib, yurtimiz tinchligi va ravnaqi uchun duoga qo'l ochdilar. Shubhasiz, G'ozg'ondagi ushbu “Nuroniylar maskani” yangi yilda keksa avlodga taqdim etilgan ezgu tuhfalardan biri bo'ldi. Majmua kelgusida mahalla hayotini yanada jonlantirish, avlodlar o'rtasidagi ma'naviy ko'prikni yanada mustahkamlashga xizmat qilishi shubhasiz.
Akmal Ahadov,
Navoiy viloyati.