Olam — biz uchun sir-sinoat va mo''jizalarga to'la had-hududsiz bir makondir. Inson — mavjudotlar oliysi, u ongu tafakkuri bilan boshqa jonzodlardan ajralib turadi. Shunday bo'lsa-da, odamzod, o'rni kelganda, mitti jonzotlardan ham ibrat oladi. Hayot ma'nosini uqadi. Xulosalar chiqaradi.
Ana shunday mehnatkash, insoniyatga foyda keltiruvchi jonzodlardan biri asalaridir. Uning ayrim ibratli xususiyatlari barchamizni hayratda qoldiradi, albatta.
- Asalari faqat toza va pokiza gullardan ozuqa oladi. Ya'ni u halol va pok manbani tanlaydi.
- Asalari avval gulni changlatadi, keyin undan ozuqa oladi. Ya'ni “olishdan oldin berish kerak” qonuniga amal qiladi.
- Asalari gulga butun vaznini tashlamaydi. U qanot qoqqan holda ozuqa oladi. Ya'ni boshqalarga yuk bo'lmaydi, o'zi harakat qiladi.
- Asalari sherigi ozuqa olayotgan gulga tegmaydi. Ya'ni birovning rizqi va mehnatiga aralashmaydi.
- Asalari maxsus raqs orqali yangi ozuqa manbasini boshqalarga xabar qiladi. U baxillik qilmaydi, foydali ma'lumotni boshqalar bilan bo'lishadi.
- Bir qoshiq asal tayyor bo'lishi uchun yuzlab asalarilar tinmay mehnat qiladi. Ammo shuncha mehnat qilsa-da, minnat qilmaydi.
- Asalari ozuqa izlab kun bo'yi katta masofalarni bosib o'tadi. U bahona qilmaydi, rizqi uchun harakat qiladi.
- Asalari o'z uyasini himoya qilish uchun jonini ham fido qilishga tayyor. Ya'ni u o'z jamoasi va makoniga sodiq.
- Bir uyada o'n minglab asalarilar birga yashaydi. Ular jamoa bo'lib ishlaydi, bir-birini qo'llab-quvvatlaydi.