Isroiljon Sultonov,
“Nuroniy” jamg'armasi Asaka tumani bo'limi raisi,
“Mehnat shuhrati” ordeni sohibi:
— Kamtarona mehnatimizning Yurtboshimiz tomonidan yuksak mukofotga loyiq ko'rilganini nafaqat men, balki asakalik nuroniylarga bildirilgan ulkan e'zoz va mehr-e'tibor namunasi deb bilaman. To'g'risi, e'zoz va mehr sururidan bugun barchamiz shodmiz. Bu e'tirof bizga o'zgacha kuch, rag'bat bo'ldi.
Davlatimiz rahbari bizga shunchalik ishonch bildirayotgan ekan, uni har lahzada oqlash harakatida bo'lishimiz shart va zarur. Yurtboshimiz tashabbuslari bilan “Inson qadri uchun!” degan g'oya ostida tarixiy yangilanishlar, islohotlar amalga oshirilayotgan ekan, ularning barchasida biz, nuroniylar ham yeng shimarib, kamarbasta bo'lib turishimiz, islohotlarning jadallashuvi, ularning samarali amalga oshishiga munosib hissa qo'shishimiz, shu Vatan, shu xalqni kamolot va taraqqiyot cho'qqilariga olib chiqishda jonbozlik ko'rsatmog'imiz lozim. Buning uchun bizga barcha sharoit va imkoniyatlar yetarli, albatta.
Fursatdan foydalanib, barcha nuroniylarni, yurtdoshlarimizni Vatanimiz mustaqilligining 35 yillik bayrami munosabati bilan chin dildan tabriklayman. Ilohim yurtimiz tinch, xalqimiz farovon va xotirjam, osmonimiz musaffo bo'lsin!