— deydi uychilik faxriy pedagog Malikaxon aya Nasriddinova
Mamlakatimiz mustaqilligining 35 yilligi tantanalariga tayyorgarlik ko'rilayotgan bugungi kunda yurtdoshlarimizning xonadonlarida ham o'zgacha fayz, o'zgacha shukuhga duch kelasiz. Uychi tumanining “Yangi chek” mahalla fuqarolar yig'inidagi Nasriddinovlar oilasi bilan yaqindan tanishib, bu fikrimizga yana bir bor amin bo'ldik.
Hovliga kirishingiz bilan mehnatkash, sarishta va oqila bekaning, tadbirli oila boshlig'ining fayzini his qilasiz. Xonadon bekasi, faxriy pedagog Malikaxon aya Nasriddinova bilan suhbatlashar ekanmiz, bu xonadon tutumlarida yosh oilalarga saboq bo'lgulik manzaralarning juda ko'pligi, odamiylik, mehr-oqibat tuyg'ularining ustuvorligini ko'rdik.
Darhaqiqat, totuv oilalar jamiyat tayanchi, baxti. Shu ma'noda, bu yil yurtimizda oila muqaddasligi, milliy qadriyatlar va ahillik muhitini keng targ'ib etishga qaratilgan “Yangi O'zbekistonning ibratli oilasi” ko'rik-tanlovining o'tkazilgani e'tiborga molik voqelik bo'ldi. Quvonarlisi, Malikaxon aya Nasriddinova ham “Ibratli oila” ko'krak nishoniga munosib deb topildi.
Malikaxon aya Nasriddinova dastlab Chust pedagogika bilim yurtida tahsil oldi.
— Chim ustida xokkey bo'yicha jamoaning eng umidli o'yinchilaridan biri edim, — deya so'zlaydi aya. — To'rt yil davomida qizlar bilan ko'plab musobaqalarda qatnashib, g'olib bo'lganmiz. Qishloqning oddiy qizi xokkeychi bo'lishiga ruxsat berishganmi, deb o'ylayotgandirsiz? Men yetti o'g'il orasida o'sgan yolg'iz qiz edim. Otam rahmatli, ismlari Tursunboy edi, menga ishonardilar. Hammaga qarshi chiqib bo'lsa ham, orzu-istaklarim amalga oshishi uchun barcha sharoitni yaratib berardilar.
Bilim yurtini tugatib, tumandagi 31-maktabga ishga kelgan Malikaxon Nasriddinova yigirma yoshida oila qurdi. Hayotini sovchilik va ota-ona roziligi bilan savdo sohasi vakili va tadbirkor bo'lgan Sodiqjon aka Nasriddinov bilan bog'lab xato qilmaganini juda qisqa fursatda anglab yetdi. Sodiqjon akaning ishbilarmonligi, Malikaxon ayaning mehnatkashligi bilan oila bugungidek mustahkam ildizli bir boqqa aylandi.
To'rt qayinsingil va to'rt qaynisi bo'lgan katta oilaga kenja kelin bo'lib tushgan Malikaxon ayaning bu xonadonda tup qo'yib, palak yozib ketishida qaynonasi Turg'unchaxon buvining xizmati katta bo'ldi. Qaynonasi unga kelinlik vazifalarini o'z o'rnida uddalashni emas, avvalo, yangi oiladagi opa-akalari, singillari bilan qarindoshlik, jigarchilik rishtalarini mahkam bog'lashni o'rgatdi. Malikaxon aya 27 yil qaynona xizmatini hech og'rinmay qildi. U paytlarda o'qituvchilar ham, o'quvchilar ham dala ishiga jalb qilinardi. U ishdan charchab kelyapman demadi, biron marta uxlamasa uxlamadiki, betob qaynonasining osh-ovqatini doim tayyor qilib qo'ydi.
Kun keldiki, Muhabbatxon, Rohatxon, Ra'noxon, O'ktamxon ismli qayinsingillari hamda Rahimaxon, Mahmudaxon, Maryamxon kabi ovsinlari bilan haqiqiy opa-singildek yaqin bo'lib ketishdi. Chinakam qadriyat deb mana shu suloladagi mehr-oqibatni aytsa bo'ladi. Ovsinining bir o'g'li Malika ayaga: “Nasib qilsa, sizni Umra ziyoratiga yuboraman”, deganini eshitib, to'g'risi, biroz hayratlandim. Ovsinni yoxud qayinsingilni dushmandek ko'radigan, har ishda bahslashib, qasdlashishga odatlanganlar ozmunchami hayotda, degan o'y ko'nglimdan o'tdi.
— Biron marta ham oramizdan sovuq gap o'tmagan, — deydi Malikaxon aya. — Ovsinlarimdan ham, qaynisingillarimdan ham minnatdorman, kasbimda ham, oilamda ham qadr topishimda, bolalarimni oyoqqa qo'yishimda ularning xizmati bor. Ular mening opalarim, singillarim. Ota-onamning yolg'iz qizi edim, taqdir meni shuncha opa-singillar bilan siyladi, ming shukr!
Malikaxon aya keyinchalik ishdan ajralmagan holda Namangan davlat universitetiga o'qishga kirdi. Maktabgacha ta'lim metodikasi fakultetida tahsil olayotgan yillarida bolalari ancha yosh, maktabdagi ishi ham yetarlicha edi. Aya boshlang'ich sinflarga — birinchi sinfdan to'rtinchi sinfga qadar 28-30 o'quvchiga saboq berardi. Yuqori sinf o'qituvchilari ayaning qo'lidan chiqqan sinfni talashishsa, ayrim ota-onalar “farzandim Malikaxonda o'qiydi” deb, hatto bolasini maktabga bir yil kechiktirib bergan vaqtlari ham bo'lardi. 
— O'qimaydigan o'quvchi bo'lmaydi, — deydi faxriy pedagog. — Qalbi zabt etilmagan bola bo'ladi. Bolaning ko'ngliga kira olsangiz, u har bir sabog'ingiz tugul, har so'zingizni qulog'iga quyib oladi. Boshlang'ich sinfda o'qitgan sobiq o'quvchilarimning oldi hozir qirq yoshdan oshgan. Katta lavozimlarda, mas'uliyatli vazifalarda ishlayotganlari ko'p. Abdurasul Nishonov, Hasanboy To'ychiboyev, Oybek Badalov, Qodirjon Yunusov, Ilyosbek Ustaboyev, Boburjon Tursunov, Sohibjon Tursunov… Eh-he, aytaversam, yuzdan oshib ketsa kerak ular soni! Bayramlarda, tug'ilgan kunimda qo'ng'iroq qilib, tabriklashadi. Oradan shuncha yil o'tsa ham, har birini ovozidanoq taniyman. Pedagoglik sohasida nimagaki erishgan bo'lsam, ustozlarim Nurxon Jamolova, Toshpo'lat Tojiboyev, Ergashali Xalilov, Zohidaxon Obilovalardan olgan qimmatli saboqlari tufayli deb bilaman.
Malika aya 37 yil davomida bir maktabda ilmiy bo'lim mudiri, uslubchi, psixologlikni ham qo'shimcha tarzda olib bordi. Bugun uning izidan Nurxon Inamova, Madinaxon Bekmirzayeva kabi shogirdlari kelyapti.
2021 yilda Malikaxon aya nafaqaga chiqdi. Qolgan umrini, hayotini oilasiga, nabiralari tarbiyasiga bag'ishlashni istadi. Bilasizmi, odamlar shunda nima deyishdi? “Maktabning vijdoni ketibdi”, deyishdi… Malika aya 30 o'quvchining onasi bir kundan navbati bilan bolalar tushligi uchun ovqat tayyorlab kelsa, o'ttiz birinchi kuni u uyida ovqat pishirib, maktabga olib borardi. Bu odatini ota-onalar qarshilik qilsa ham, kanda qilmasdi. Shunchaki dars o'tayotgan o'qituvchini o'zgarmaguncha tinch qo'ymasdi. “Ilm – bolalarning haqqi. Xiyonat qilishga haqqingiz yo'q”, derdi… Shuning uchun u maktabning vijdoniga aylangan edi.
Malikaxon aya elda hurmat-e'zoz topganidan, oilasi tinch, halovatga to'la, farzandlari xalq xizmatida ekaniga shukronalar keltiradi. Umr yo'ldoshi Sodiqjon akadan uning har qanday vaziyatda unga yelka tutib bergani, ota deyishga arzirli inson bo'lgani, o'g'illar tarbiyasida mas'uliyatni unutmagani, ro'zg'orida kamlik ko'rsatmagani uchun minnatdor bo'ladi. Uch farzand — uch o'g'il bugun ota-ona bergan tarbiyani oqlab kelishyapti. Dilshodbek Toshpo'latov energetika sohasi vakili, to'ng'ich kelin Nasibaxon 20-maktabda biologiya fanidan o'quvchilarga dars beradi. Dilshodbek va Nasibaxon Fozilbek, Imronbek va Xadichaxonlarni tarbiyalab kelishyapti. O'rtancha o'g'il Doniyorbek tuman tez tibbiy yordam bo'limida haydovchi, o'rtancha kelin E'zozaxon esa hamshira. Ularning farzandlari Umarxon, Oyisha va Muhammadayub. Ular ham boshqa nabiralar kabi xonadon quvonchlari. Davronbek iqtisodchi. Kenja kelin Madinaxon ham pedagog, 10-maktabning matematika fani o'qituvchisi. Ularning bir o'g'li bor, ismi Muhammadyusuf.
— Aslida ham, oila qo'rg'onining g'ishtlari oqillik va sabrdan yaralishi kerak. Oilaning fayzu barakasi onalarning oqilaligi, qaynonalik mahorati va buvilik zakovatiga bog'liq, — deydi Malikahon aya.
— 41 yillik ibratli hayot yo'liga ega bu oila har jihatdan boshqalarga o'rnak bo'lishga arziydi, — deydi “Yangi chek” mahalla fuqarolar yig'ini xotin-qizlar faoli Sohibaxon To'ychiboyeva. — Nasriddinovlar oilasi kabi “Ibratli oila” degan nomga tom ma'noda munosib oilalarning taqdirlangani yurtimizda mustahkam oilalar soni ortishiga xizmat qiladi.
Shahlo TOShBEKOVA,
Namangan viloyati.