Davlatimiz rahbari Shavkat Mirziyoyevning “Muborak Qurbon hayitini nishonlash to'g'risida”gi Qarori qabul qilindi.
Unga ko'ra, O'zbekiston musulmonlari idorasining axboroti inobatga olinib, yurtimizda Qurbon hayitining birinchi kuni 2026 yil 27 may – chorshanba kuni etib belgilandi va ushbu sana mamlakatimizda bayram sifatida keng nishonlanadi.
Jamiyatimizda insonparvarlik, saxovat va hamjihatlik kabi ezgu qadriyatlarni mustahkamlashda ushbu muborak ayyom alohida ahamiyat kasb etishi ta'kidlangan.
Hujjatga muvofiq, Mehnat kodeksi va Prezidentning tegishli Farmoniga asosan o'zbekistonliklar ushbu bayramda ketma-ket 5 kun dam olishadi.
Bunda 27 may (chorshanba) – bayram kuni, 28 may (payshanba) va 29 may (juma) – barcha xodimlar uchun qo'shimcha dam olish kuni, 30 may (shanba) – olti kunlik ish haftasidagilar uchun qo'shimcha dam olish kuni (besh kunliklar uchun odatiy dam olish kuni) hamda 31 may – yakshanba kuniga to'g'ri keladi.
Sanalarning bunday tartibda belgilanishi yurtdoshlarimizning bayramni oila davrasida mazmunli o'tkazishlariga xizmat qiladi.
Qaror bilan Qurbon hayitini milliy an'analarga uyg'un va yuqori kayfiyatda o'tkazish bo'yicha tegishli tashkilotlarga aniq topshiriqlar berildi.
Xususan, mahalliy hokimliklar va hamkor idoralar tomonidan ijtimoiy ko'makka muhtoj insonlarni qo'llab-quvvatlash choralari ko'riladi.
Shuningdek, Turizm qo'mitasi va Transport vazirligi bayram kunlarida aholining mo''tabar ziyoratgohlar hamda tarixiy qadamjolarga qulay va xavfsiz sayohatlarini tashkil etish maqsadida barcha zarur sharoitlarni yaratadi.
Dilyara Sirojiddinova