Yangi yil yaqinlashgani sayin katta-yu kichikning qalbi shukuhga to'ladi. Chunki Yangi yil yaqinlarni bir dasturxon atrofida birlashtiradi, shirin suhbatlar, yaqinlar diydori uchun yaxshigina sabab bo'la oladi. Qolaversa, odamlar bir-birini yo'qlaydi, sovg'a-salom ko'tarib, keksalar va bemorlar holidan xabar olishadi. Bu — bizga tanish bayram an'analari. Xo'sh, dunyoda Yangi yil qanday kutib olinadi?
– Braziliyada Yangi yilda yasmiq iste'mol qilish an'anaga aylangan. Aytishlaricha, yasmiq pul, boylik ramzi ekan, uni yangi yilda iste'mol qilgan odam uchun yil omadli bo'larmish… Shuningdek, ular bayramda oppoq kiyim kiyishadi. Ularning fikricha, oq rang ham kelgusi yilda omad keltirar ekan.
– Yaponiyaliklar esa 31 dekabr kuni uy tozalashadi. Bu hatto yapon xaqining qadriyatiga aylangan.
– Ruminiyada tangani daryoga uloqtirish odati bor, bu ham yangi yilda omad keltirishi bilan izohlanadi. Qolaversa, Ruminiyada odamlar go'yo yovuz ruhlarni quvib chiqarish maqsadida raqsga tushayotgan ayiqlar kiyimini kiyishadi. Sababi, ayiqlar qadimgi Ruminiya hikoyalariga asosan, odamlarni himoya qilishga va davolashga qodir bo'lgan.
– Greklarning bayram an'analari qiziq: ular baxt, omad, shuningdek, hosildorlik, unumdorlik, yuqori samaradorlikka ishonib, eshiklari tepasiga bir qancha piyoz osib qo'yishadi. Hatto keyingi kun undan grekcha yangi yil taomini tayyorlashlari ham mumkin.
– Irlandiyada marhumlarning ruhiga hurmat namunasi o'laroq, hatto ularning ruhi kirib kelishiga ishonib, eshikni ochiq qoldirishadi, Yangi yil kechasi bayram dasturxonida ham ular uchun bo'sh joy qoldirishar ekan.
So'g'diyona Sobirova tayyorladi.