Yurtimiz nuroniylari o'rtasida “G'ayratli keksalar” shiori ostida o'tkazilayotgan sport musobaqalari nafaqat ularning sihat-salomatliklarini muhofaza qilish, jismoniy faolliklarini oshirish, balki faxriy keksalar o'rtasida o'zaro mehr-oqibat, jamoaviylik munosabatlarini yanada mustahkamlashda asosiy omillardan bo'lmoqda.
Sportning shaxmat-shashka turi bo'yicha o'tkazilgan bellashuvlarning Toshkent shahar bosqichi bahslari fikrimizning yaqqol isbotidir.
Alisher Navoiy nomidagi O'zbekiston Milliy kutubxonasida o'tkazilgan tadbirda “Nuroniy” jamg'armasi Toshkent shahar bo'limi raisi, senator Rustam Kalonov so'zga chiqib, bugungi kunda mamlakatimizda nuroniylarga qaratilayotgan yuksak e'tibor, ularga yaratilayotgan shart-sharoit, o'zgacha hurmat-ehtirom haqida alohida to'xtalib o'tdi. O'z navbatida, musobaqa ishtirokchilariga omad tiladi.
Bellashuv olimpiya tizimida o'tkazildi. Bahslar g'oyat qizg'in, murosasiz, ayni paytda do'stona va samimiy kechdi. Shaxmat-shashka ishqibozlari bellashuvlar jarayonida mahoratli o'yinchilarni kashf etdilar.
Musobaqa yakuniga ko'ra, hakamlar hay'ati tomonidan g'olib va sovrindorlar e'lon qilinib, mutasaddilar g'oliblarga galdagi bosqichda ulkan muvaffaqiyatlar tiladilar.
Tadbir yakunida musobaqa g'olib va sovrindorlariga diplom, medal va esdalik sovg'alari tantanali ravishda topshirildi.
Hojiakbar Vapayev,
Toshkent shahri.