50 ёшдан кейин тадбиркор сифатида муваффақиятга эришишни имконсиз деб ўйлайсизми? Агар шундай бўлса, адашасиз. Кексайганда ҳам ўз бизнесини энг қуйи босқичдан бошлаб, катта муваффақият қозонган кўплаб одамлар бор. Статистик маълумотларга қараганда, дунёдаги тадбиркорларнинг бизнесдаги энг омадли даври ҳам айнан 55 ва ундан юқори ёшда бошланар экан.
Топлиффлар оиласи ортга чекинмади
56 ёшли Гина Топлифф Фрост ва унинг турмуш ўртоғи 57 ёшли Жон Топлифф 2011 йилда драма ўқитувчилигидан ишдан бўшатилганида ўз театрларини очишга қарор қилишган. Аввалига, улар Буюк Британиянинг Манчестер штатида жойлашган марказий савдо мажмуасидаги бўш хонани ижарага олишган ва “Уч дақиқа” номли театрга асос солишган. Театр янги иш бошлаган пайтда томошабинлар деярли спектаклларга келмаган, бироқ эр-хотин саҳналаштириладиган спектаклнинг кастюмлари ва бошқа реквизитлардан реклама сифатида фойдалана бошлашганидан кейин одамларнинг эътиборини торта бошлаган. Кейинроқ оила худди шу марказдаги катта дўконга кўчиб ўтган. Бир неча йил олдин ўнга яқин томошабин билангина ўтадиган спектаклларга ҳозирги кунда 100 га яқин томошабин ташриф буюради. “Биз бу ёшда ишга жойлашиш қийин бўлишини билардик, шунинг учун таваккал қилдик ва буни уддаладик. Тадбиркорлик қила олишимизни ақлимга сиғдира олмас эдим”, — дейди Топлифф Фрост.
Кари Жонстон
45 йиллик ҳамшираликдан сўнг нафақага чиқиши кераклигини ҳис қилган шотландиялик Кари Жонстон 63 ёшида профессионал уй тозалаш хизматини очишга қарор қилган. Карининг сўзларига кўра, у уй тозалаш хизмати ҳақида журналда ўқиб қолади ва бу хизматни ишга туширишга қизиқади. Ўша куннинг ўзидаёқ веб-сайт яратиб, реклама жойлаган. Биринчи мижозлари унинг дўстлари бўлган. Орадан уч ярим йил ўтгач, аёл бутунлай ҳамшираликдан нафақага чиққан ва ўзининг янги бизнесини янада кенгайтиришга киришган.
“Уй тозалаш — менга жуда ёқадиган машғулот. Аксарият ишлар камида тўрт соат давом этади. Мен ўз даромадимни соғлигим, кундалик харажатларим ва итимиз билан сайр қилиш, шунингдек, набирамизга ғамхўрлик қилишга сарфлайман”,— дейди собиқ ҳамшира.
Бунёдбек Келдибоев тайёрлади.