Чой хушхўр ичимликлардан бири, айниқса, ёши катталар орасида унинг шинавандалари кўп. “Бир пиёла чой устида гурунглашамиз”, “киринг, бир пиёла чойимиз бор” каби иборалардан билиш мумкинки, чой аллақачон турмуш тарзимизнинг бир қисмига айланиб улгурган. Чойни кўпчилик ҳамюртларимиз севиб истеъмол қилса-да, мамлакатимизда бу маҳсулотга бўлган эҳтиёж, асосан, импорт ҳисобидан қопланади.
Халқаро чой ишлаб чиқаришнинг деярли ярми Хитой ҳиссасига (3,74 миллион тонна) тўғри келади. Шунингдек, ушбу саноатда йирик бешликка Хитойдан ташқари, Ҳиндистон, Кения, Туркия ва Шри-Ланка ҳам киради..
Ҳар уч кишининг камида иккитаси севиб истеъмол қиладиган бу маҳсулот, Хитой камеллияси ёхуд Camellia sinensis ўсимлигидан тайёрланади. Ишлаб чиқариш, қуритиш ва ферментлаш жараёнидаги тафовутга кўра, унинг қора, яшил каби турлари фарқланади.
Чойнинг севимли ичимликка айланиши шунчаки ҳодиса эмас. Унинг инсон саломатлиги учун қатор фойдаси бор. Camellia sinensis ўсимлигининг минглаб йиллардан бери етиштирилаётгани ва илгарилари унинг баргидан тиббий мақсадларда фойдаланилгани мазкур фикрни тасдиқлайди. Кексаларни билгани билган, деган гап ҳам бежизга айтилмаган, замонавий тадқиқотларга кўра, чой яллиғланишга қарши ва антиоксидант хусусиятга эга экани, шунингдек, юрак касалликлари, юқори қон босими, диабет хавфини, стрессни камайтириш, ақлий фаолиятни яхшилаб, қон қуюқлашиши хавфини камайтириш каби хусусиятларга эга эканини тасдиқламоқда.